ካልእ ኣጋጣሚ ኣዕዋፍ ኣብ መስዋእቲ ዝተጠቕማሉ ኣብ ምጽራይ ለምጻም እዩ። ቅዱስ ጽሑፍ ከምዚ ይብል፡ «ኩሎም ሓጢኦም ክብሪ ኣምላኽ ድማ ስኢኖም» (ሮሜ 3:23)። ኩላትና መንፈሳውያን ለምጻማት ነበርና! ለምጺ ክሕዊ ዝኽእል ኣምላኽ ጥራይ እዩ፡ ኣካላዊ ለምጻማት ኣብ እስራኤል ይኹኑ ወይ ድማ ናይ ሎሚ መንፈሳውያን ለምጻማት።
ኣብ መጀመርታ ናይ ስርዓት ምጽራይ ለምጻም፡ ክልተ ኣዕዋፍ ክውሰዳ ነይረን። እዘን ኣዕዋፍ እዚኤን ንጹሓትን ህያዋንን ክኾና ከም ዝነበራ ኣስተውዕል። ኣብ መስዋእቲ ኖህ (ዘፍጥረት 8:20)፡ ኣብ መንጎ ንጹሓትን ርኹሳትን ኣዕዋፍ ፍልልይ ተገይሩ ኣሎ። ክርስቶስ ንጹህ ነይሩ፡ ንሕና ድማ ብሓጢኣትና ርኹሳት ነበርና። እዘን ኣዕዋፍ እዚኤን ድማ ህያዋን ክኾና ነይረን፡ ብኣንጻር እቲ ኣብ ትሕቲ ፍርዲ ሞት ዝነበረ ለምጻም። ንሕና ድማ ኩላትና ብበደልናን ሓጢኣትናን ምዉታት ነበርና (ኤፌሶን 2:1)፡ ንኣምላኽ ምዉታት።
ሓንቲ ኻብተን ኣዕዋፍ ኣብ መሬታዊ ኣቕሓ ክትቕተል ነይርዋ። እቲ ዘለኣለማዊ ወዲ ኣምላኽ ናብዛ ዓለም እዚኣ መጺኡ፡ ንዕኡ ዝተዳለወ ስጋ፡ መሬታዊ ኣቕሓ፡ ከም ዝወሰደ ክንደይ ዘደንቕ እዩ (እብራውያን 10:5)። ብስጋኡ፡ ንሱ «ብዘለኣለማዊ መንፈስ ንርእሱ ንኣምላኽ ብዘይነቀፋ መስዋእቲ ገይሩ ኣቕረበ» (9:14)። እቲ ኣብ ጥቕስና ዘሎ ዝውሕዝ ማይ ንመንፈስ ቅዱስ የርኢ።
ሽዑ፡ እታ ኻልአይቲ ዑፍ ኣብ ደም እታ ቐዳመይቲ ዑፍ ክትጥሕልን ናብ ኣየር ክትፍኖን ነይርዋ። እታ ኻልአይቲ ዑፍ ብዛዕባ ትንሳኤ ክርስቶስ ትዛረብ። ንሱ ተንሲኡ ኣሎ፡ ስሙ ይኽበር! ንሱ «ስለ በደልና ተዋሂቡ፡ ንጽድቅና ድማ ተንሲኡ» (ሮሜ 4:25)። እዚ እዩ እቲ ምኽንያት እታ ኻልአይቲ ዑፍ ኣብ ደም ዝጠሓለት። እዚ ድማ እቲ ለምጻም ኣብ ቅድሚ ኣምላኽ ከም ዝጸረየ መርትዖ እዩ ነይሩ። ንዓና ደም ክርስቶስ ፈሲሱ ኣሎ። ንሕና ንሓዋሩ ጸሪናን ጸዲቕናን ኢና (5:1, 9)!
