እቶም ክልተ ሰለይቲ የሱስ ናብ ኤሪኮ ዝሰደዶም መልእኽተኛታት ተባሂሎም እውን ይጽውዑ። ንኤሪኮን ንንጉሳን ኪድለዩን ኪቕተሉን ዝግብኦም ሰለይቲ ነበሩ። ንረሃብ ኣመንዝራን ንስድራቤታን ድማ መልእኽተኛታት ምድሓን ኮይኖም ተረኽቡ። ምእመናን ሎሚ ንኣምላኽ ጥዑም መኣዛ ክርስቶስ እዮም። ነቶም ዚጠፍኡ፡ መልእኽቲ ምድሓን ኣምላኽ ንዚነጽጉ፡ ንሕና መኣዛ ሞት ናብ ሞት ኢና፡ ነቶም ዚድሕኑ ግና መኣዛ ህይወት ናብ ህይወት ኢና።
ረሃብ ከነኣናዊት፡ ሓጢኣተኛ ሰበይቲ፡ ብበደላትን ሓጢኣታትን ዝሞተት ነበረት። ብባህሪኣ ካብ ካልኦት ህዝባ ዝሓሸት ኣይነበረትን። ይኹን እምበር፡ ካብ ህዝባ ዝነበራ ታማኝነት ብምጥላም፡ ንየሆዋ ሓቀኛ ኣምላኽ ምዃኑ ብምእማን፡ ንመልእኽተኛታቱ ብሕያውነት ብምሕጋዝ፡ ብምሕባእን ህይወቶም ብምድሓንን ሓቀኛ ንስሓ ኣርኣየት። ብእምነት ኣብ ምሕረት ኣምላኽ ተወኪላ፡ ንገዛእ ርእሳ ጥራይ ዘይኮነስ፡ ንኹላ ስድራቤታ ኻብቲ ንህዝባ ዚጽበዮ ዝነበረ ሞት ምድሓን ኣምላኽ ደለየት። ህይወታ ንኸተንጽህ፡ እስራኤላዊት ንኽትከውን ኣይተነግራን። ኣብ መስኮታ እቲ ቀይሕ ገመድ—ነቲ ደም ክርስቶስ ዜዘኻኽር—ብምስቓል ንሰለይቲ ናብ ታሕቲ ኣውረደቶም። ስድራቤታ እውን ኣብ ቤታ ድሕሪ እዚ ገመድ እዚ ኺዕቆቡ ነበሮም።
ፍርዲ ኣምላኽ ኣብዛ በዳሊት ዓለም እዚኣ ቐልጢፉ ኸም ዚወርድ ርግጸኛታት ዲና? ብዛዕባ ምድሓንናን ምድሓን እቶም ንፈትዎም ሰባትን ንሓስብ ዲና? ኣብዛ ጐይታ የሱስ ገና ዚንዓቕን ዚነጽግንዋ ዓለም እዚኣ፡ ንጐይታ የሱስ ብግልጺ ኽንእመን ድሉዋት ዲና?
