«ደቂ እስራኤል ከም ብሓድሽ ኣብ ቅድሚ እግዚኣብሔር ክፉእ ገበሩ… እግዚኣብሔር ድማ ኣብ ኢድ ያቢን ንጉስ ከነኣን፡ ኣብ ሓጾር ዝነገሰ፡ ሸጦም» (መሳፍንቲ 4:1-2)። ሓጾርን መሓዙታን ቅድሚ እዚ እዋን እዚ ብዮሹዋ ሚእቲ ዓመት ኣቐዲሙ ከም ዝተሳዕሩ (ዮሹዋ 11:10-15)፡ ካብ ገጽ ምድሪ ድማ ከም ዝጠፍኡ ምጥቃስ ኣገዳሲ እዩ። ብምሉኡ እንተ ተደምሲሱ ነይሩ፡ ስለምንታይ ከም ብሓድሽ ንሰምዖ? ንሓጾር ንዓና ዝገዝአና መንፈሳዊ ክፉእ ነገር ከም ዝውክል እንተ ርኢናዮ፡ ኣገዳሲ ትምህርቲ ንረክብ። ኩላትና ከምዚ ዝኣመሰለ ነገር ምብዳህን ድሕሪኡ ሓደ መዓልቲ እቲ ናይ ቀደም ጸላኢ፡ ከምኡ ሓያል ኮይኑ ምምጻኡን ከም ብሓድሽ ምቅላስን እንታይ ማለት ምዃኑ ንፈልጥ።
ስም ንጉስ ሓጾር ኣገዳሲ እዩ—«ምስትውዓል» ማለት እዩ። ሓይሊ ሰብኣዊ ኣእምሮ ኣብ ክንዲ ሓይሊ ቃል ኣምላኽ ክገዝእ እንተ ፈቒድናሉ፡ ምስትውዓል ጸላኢ ክኸውን ይኽእል እዩ። ሓይሊ ናይ ሰብኣዊ ምስትውዓል ጥራይ ኣብ መለኮታዊ ነገራት ምግዛእ ዘፍርህን ዘስካሕክሕን ነገር እዩ። «ያቢን» ከምኡ ድማ ነቶም ብብርሃን ምስትውዓሎም ዝረብሑ ስለ ዝኾኑ «ብርሃን እግዚኣብሔር» ዘይደልዩ ሰባት ይውክል።
ኣእምሮ ካብ ኣምላኽ ወጻኢ ምጥቃም፡ ብዝኾነ ይኹን ስም እንተ ተሰዊሩ፡ ዘይምእማን ማለት እዩ። ኤስ.ኣር.
