ኣብ ምምራሕ ስድራቤት ትፈርሕ ዲኻ? ሙሴ ዘክር!
ሎሚ ውሉዳት ናብ ዓለም ምምጻእ ንብዙሓት ፍርሂ የሕድር። ሓንቲ ክርስትያን ሎሚ ንውሉዳት ዝጽበዮም ዘሎ ብዙሕ ሓደጋታት ጥራይ ዘይኮነስ፡ ብብዙሕ ፈተናታት ዓለም – “ፍትወት ስጋ፡ ፍትወት ኣዒንቲ፡ ትዕቢት ህይወት” (1 ዮሃንስ 2:16) ከም ዝስሓቡ ስለ ዝኾነ፡ ውሉዳት ንምውላድ ከም ዝፈርሕ ነገረትኒ። ሎሚ ንእግዚኣብሄር ውሉድ ምዕባይ ተስፋ ዘይብሉ ክመስል ከሎ፡ እዚ ኹነታት እዚ ኻብቲ ሙሴ ኣብ ግብጺ ዝነበረሉ ግዜ ዝኸፍአ ድዩ? ሽዑ ኹሉ ዝተወልደ ወዲ እስራኤል ኣብ ሩባ ሞት ይጽበዮ ነበረ (ዘጸኣት 1:22)፡ ኹለን ኣዋልድ ድማ ናይ ባርነት ህይወት ይጽበየን ነበረ (ዘጸኣት 1:14)።
ዓይኒ እምነት ነቲ ናይ ሕጂ ኹነታት ሓሊፉ፡ ነቶም ንእግዚኣብሄር ንምኽባር ዝዓበዩ ውሉዳት መደብ ኣምላኽ ትርኢ። ኣብ ጉዳይ ሙሴ እዚ ኣብ ስም ኣባላት ስድራቤቱ ይግለጽ፡ ዮካቤድ – “እግዚኣብሄር ክብሪ ዝመልኦ እዩ”፡ ኣምራም – “ህዝቢ ልዑል እዩ”፡ ሙሴ – “ምውጻእ”። እዚ ንዓና ንዓለም ከይንፈርህ ኣይተባብዓናን ድዩ? ምኽንያቱ ኣምላኽ ነቶም ዘኽብርዎ የውጽእን የልዕልን እዩ።
ብዙሓት ሎሚ፡ ክርስትያናዊ ምዕባይ ምስ ብዙሕ ሓጥያተኛ ዝኾነ መሳጢ ነገራት ዓለም ክወዳደር ከም ዘይክእል ይሓስቡ፡ ግናኸ ታሪኽ ሙሴ ካልእ እዩ ዝነግረና። ወለዱ ንሳልስቲ ወርሒ ጥራይ ምስኡ ነበሩ እሞ፡ ድሕሪኡ ኣብ ማይ ኣንበሩዎ። ይኹን እምበር፡ በቲ ሓጺር ግዜ እቲ “ሓብእዎ” (ዘጸኣት 2:2) ኻብ ጸላኢ፡ ከምቲ እብራይስጥ ቃል ዝሕብሮ ድማ ንኣምላኽ ሓለፍዎ። እዚ ምሕባእ እዚ፡ ምስቲ እቲ ሕጻን ንኣዲኡ ንምጥባይ ዝተመልሰሉ ተኣምራዊ ምምላስ፡ ካብቲ ከም “ወዲ ጓል ፈርኦን” (ዘጸኣት 2:10፤ እብራውያን 11:24) ዝረኸቦ ዓለማዊ ስልጠና ዝዓበየ ጽልዋ ነበሮ።
ሙሴ ኣብ መንገዲ ገለ ጌጋታት እንተ ገበረ እኳ፡ (ዘጸኣት 2:12)፡ “ካብቲ ሓላፊ ሓጥያት ምጥዓምሲ፡ ምስ ህዝቢ ኣምላኽ መከራ ምቕባል ፈተወ፡ ንጸርፊ ክርስቶስ ድማ ካብ ሃብቲ ግብጺ ዝዓበየ ሃብቲ ገይሩ ቖጸሮ” (እብራውያን 11:25-26)። ውሉዳትና ኣብ ክርስቶስ እንተ ተሓብኡን ንክርስቶስ እንተ ዓበዩን፡ ንሳቶም እውን ንእኡ ከም ዝነብሩ ብእምነት ክንጽበ ኣይንኽእልን ዲና?
