«ወዲ ሰብሲ ዝጠፍኤ ኺድህስስን ኬድሕንን መጺኡ እዩ እሞ።» (ሉቃስ 19:10)
«እቲ ኣቦ ኸምዚኣቶም ኣምለኽቲ እዩ ዚደሊ እሞ።» (ዮሃንስ 4:23)
ኣብታ ቐዳመይቲ ጥቕሲ፡ ጐይታ የሱስ ነቲ ዝጠፍኤ ኺድህስስን ኬድሕንን ከም ዝመጸ ንርኢ። ኣብታ ኻልአይቲ ጥቕሲ ኸኣ፡ እቲ ኣቦ ንወዱ ዝለኣኾ፡ ንምድሓን ጥራይ ዘይኮነስ፡ ንምምላኽ ዝኸውን ህዝቢ ንምፍራይ ምዃኑ ንርኢ። እቲ ቐንዲ ምኽንያት ምድሓንና ኻብ ገሃነም ንምምላጥ እዩ ዚመስለና። እዚ ብርግጽ ብሉጽ ረብሓ እዩ፡ ግናኸ እቲ ቐንዲ ዕላማ ኣይኮነን። ኣብ ክርስቶስ ዘሎና በረኸት ክንሕጐሰሉ እንኽእልን ዚግባእን እኳ እንተዀነ፡ እቲ ቐንዲ ትኩረትና ኪኸውን የብሉን። ብበረኸት ክሳዕ ክንድዚ ኽንሕጐስ የብልናን፡ ከመይሲ ነቲ በረኸት ዝህበና ኽንርስዕ ንኽእል ኢና።
እቲ ኣብ ምድሓንና ዘሎ እቲ ልዕለ-ልዑል ዕላማ፡ ንሕና ንምቕባል ዘይኮነስ፡ ኣምላኽ ንምቕባል ምዃኑ ምፍላጥና ኼገርመና ይኽእል እዩ። ኣምላኽ ብህይወትና ኺምለኽን ኪኸብርን ኢሉ እዩ ኣድሒኑና። ሃዋርያ ጳውሎስ ከምዚ ኢሉ ገሊጽዎ ኣሎ፦
ንእኡ ኣብ ማሕበር ብክርስቶስ የሱስ ንዅሉ ወለዶታት፡ ንዘለኣለመ ኣለም ክብሪ ይኹን። (ኤፌሶን 3:21)
ኣብ ሮሜ 1:5፡ ዕላማ ወንጌል «ምእንቲ ስሙ ኣብ ኲሎም ኣህዛብ ንእምነት ምእዛዝ» ምዃኑ ንመሃር። ሃዋርያ ዮሃንስ እዚ ኣብ 3 ዮሃንስ 7 ይድግሞ፡ ሚስዮናውያን «ምእንቲ ስሙ» ኸም ዝወጹ ይጽሕፍ። ምድሓንና ቐዳምነት ንኽብሪ ኣምላኽ እዩ፡ ንጥቕምና ጥራይ ኣይኮነን።
ብርግጽ፡ ኣብ ምድሓን ዘይተወሰነ በረኸት ንረክብ ኢና! ግናኸ እዚኣቶም ተወሳኺ ረብሓታት እዮም እምበር፡ እቲ ቐንዲ ዕላማ ኣይኮኑን። ካብኡ ገለ ንምርካብ ቅድሚ ምፍታንና፡ ንኣምላኽ ንኸንብሮ ተጸዊዕና ኢና።
እዚ እዩ ጐይታ የሱስ ከምዚ ኺብል ከሎ ዘጕልሖ፦
ቅድም መንግስቲ ኣምላኽን ጽድቁን ድለዩ፡ እዚ ዅሉ ኸኣ ይውሰኸልኩም እዩ። (ማቴዎስ 6:33)
ኣብ ምሉእ ቅዱሳት ጽሑፋት፡ እቲ ቐንዲ ንጥፈት ኣምላኽ ኵሉ ሳዕ ናይ ሓቂ ኣምለኽቲ ምድላይ ምዃኑ ንርኢ። ኣብ ራእይ 19:1–5፡ እታ ኣብ ሰማይ ዘላ ማሕበር ከምዚ ትእውጅ፦
ሃሌሉያ! ምድሓንን ክብረትን ክብርን ሓይልን ናይ ጐይታ ኣምላኽና እዩ! ፍርዱ ሓቅን ጽድቅን እዩ እሞ… ሃሌሉያ! … ኣሜን! ሃሌሉያ! … ንኣምላኽና ኣመስግንዎ፡ ኵልኹም ኣገልገልቱን እትፈርህዎን፡ ንኣሽቱን ዓበይትን!
እቲ ቐንዲ ዕላማ ሰማይ፡ ንኣምላኽ ብግቡእን ንዘለኣለሙን ምምላኽና እዩ።
መርከብ ንሎሚ
ሕጂ እውን ንኣምላኽ ከም ኣቦና ንምምላኽ ከም ዝደሓንና ንረዳእ፡ ነቲ ንሱ ዘድሓነናሉ ዕላማ ኸኣ ክንነብሮ ንጀምር።
