ሙሴ ድማ በለ… “ጽፍሒ ሕሶብ ወሲድኩም ብደም ኣጥቢሕኩም… ገለ ኻብቲ ደም ኣብ… ማዕጾ… ግበሩ። እግዚኣብሔር ኣብ ምድሪ ኺሓልፍ ከሎ… እቲ ኣጥፋኢ ኺወቕዓኩም ኣይፈቅድን እዩ።” ዘጸኣት 12:22-23
ጽፍሒ ሕሶብ ምስ ብስራት ምድሓን እንታይ ኣተሓሕዛ ኣለዎ?
ብዙሓት ሰባት ምድሓን ብእምነት ጥራይ ከም ዝኾነን ደም የሱስ ጥራይ ካብቲ ዚመጽእ ፍርዲ ከም ዜድሕኖምን “ይፈልጡ” እዮም። ይኹን እምበር፡ እዚ ምፍላጥ ጥራይ ኣይኣክልን እዩ። ብምሳሌ እምብኣር፡ “ጽፍሒ ሕሶብ” ብገዛእ ኢዶም እንተ ዘይወሰዱ፡ ብደም እቲ ገንሸል እንተ ዘየጥበይዎ፡ ከምቲ እግዚኣብሔር ዝኣዘዞ ድማ ኣብ ትሕቲ ምልክቱ እንተ ዘይገበሩ ርእሶም፡ ምናልባት ኣይድሕኑን እዮም።
እቲ ጽፍሒ ሕሶብ ተግባር የመልክት። እቲ ንትልሚ እግዚኣብሔር ንምድሓን ካብ ባርነት ዝሰምዐ እስራኤላዊ፡ ነቲ ትልሚ “ምፍላጥ” ጥራይ ኣይነበረን ዚግባኦ። ብእምነት ክሰርሓሉ ነበሮ። ብዘይ ጥርጥር፡ ናብ ወጻኢ ወጺኡ ማዕጾኡ ብደም ምቕባእ ውርደት ነበረ፡ ግናኸ እዚ እዩ ኺገብሮ ዝነበሮ።
ነቲ ጽፍሒ ሕሶብ ወሲዱ ኸምቲ እግዚኣብሔር ዝኣዘዞ ምስ ገበረ፡ ኣብ ቅድሚ ዘይኣምን፡ ብርእሱ ዝምርኮስ፡ ጣኦታዊ ህዝቢ፡ እንኮ ምክልኻሉ ኻብቲ ዚመጽእ ፍርዲ ሞት ምስ ደም ገንሸል ኣምላኽ፡ “ገንሸል ኣምላኽ፡ ንሓጢኣት ዓለም ዜርሕቕ” (ዮሃንስ 1:29)፡ ምምስሳል ምዃኑ ይእውጅ ነበረ።
ንስኻ ብብስራት ምድሓን ትኣምንዶ?
ኣብ ትሕቲ ምልክት ደም እቲ ገንሸል ድሑን ዲኻ? እንተ ዘይኮንካ፡ ሕጂ ነቲ ጽፍሒ ሕሶብ ውሰድ፡ ሓጢኣትካ ንኣምላኽ ተናዘዝ እሞ ብደም ክርስቶስ ከም ዝደሓንካ ንገሮ። እቲ ዚመጽእ ፍርዲ ሞት ኣምላኽ ዘስካሕክሕ ኪኸውን እዩ፡ ግናኸ ኣብ ደም እቲ መድሓኒ ምእማንካ እንተ ረኣየ፡ “ኣይወቕዓካን” እዩ። ቃሉ ይብል እዩ፡ ንቃሉ ድማ እሙን እዩ!
