እዞም ኣብ ላዕሊ ዘለዉ ሓረጋት፡ ሃዋርያ ጳውሎስ ኣብ ቀዳሞት ዓመታት ኣገልግሎት እግዚኣብሔር ዝተሰከሞም ገለ መከራታት ይዝርዝሩ። ኣብዚ ብመከራታቱ ኣይተመክሐን፡ ከምኡ ድማ ኣብ ግብሪ ሃዋርያት 22 ኣብ ቅድሚ ህዝቢ ኣይሁድ ምስክርነቱ ኺህብ ከሎ ወይ ኣብ ግብሪ ሃዋርያት 26 ኣብ ቅድሚ ፌስጦስ፡ ንጉስ ኣግሪጳ፡ ከምኡ ድማ ካልኦት ዓበይቲ ሰባት ኪዛረብ ከሎ ነዚ መከራታት ኣይጠቐሰን። «ከም ዓሻ እየ ዝዛረብ» በለ፡ ነዚ ፍጻመታትን ካልኦትን ንቆሮንቶሳውያን እናተኣናገደ ኺጠቅስ ከሎ፡ እቲ እግዚኣብሔር ዝኣመኖ ኣገልግሎት ካብቶም ሓሰውቲ ኣሕዋት ዚወርዶ ዝነበረ መጥቃዕቲ እናተኸላኸለ።
ቅድሚ ምድሓኑ፡ ኣብ የሩሳሌም ክርስትያናት ኣሳዲዱ ነይሩ፡ ክሳዕ ወጻኢ ሃገራት ከተማታት እውን፡ ኣብ ቤት ማእሰርቲ ኣእትዩ ይቐትሎም ነበረ። ኣብ ግብሪ ሃዋርያት 9፡ ኣብ ደማስቆ፡ እግዚኣብሔር ንኣናንያ፡ «ስለ ስመይ ክንደይ ክመከሮ ኸም ዘለዎ» ከርእዮ ምዃኑ ነገሮ። ድሕሪ ምልዋጡ ብቕጽበት፡ ኣይሁድ ክቐትልዎ መደቡ፡ ንደጌታት ድማ ለይትን መዓልትን ይሕልዉ ነበሩ። ናብ የሩሳሌም ምስ መጸ፡ ብስም እግዚኣብሔር የሱስ ብትብዓት ተዛረበ፡ ምስ ግሪኻውያን ድማ ተኻራኸረ፡ ንሳቶም እውን ክቐትልዎ ፈተኑ፡ ስለዚ ኣሕዋት ናብ ታርሰስ ሰደድዎ።
ከምቲ ንቆሮንቶሳውያን ዝጸሓፎ ኸም እንርእዮ፡ ህይወቱ ብብዙሕ ዓይነት መከራ ተመሓዘ። ብዛዕባ ዘይፍትሓዊነት መሳደድቱ ከይተማረረ፡ ኩሉ ካብ እግዚኣብሔር ተቐበለ፡ ንርእሱ ድማ እሱር ክርስቶስ ምዃኑ ተኣመነ! ኣብ መወዳእታ መልእኽቱ ንጢሞቴዎስ፡ «ኵሎም እቶም ብክርስቶስ የሱስ ብፍርሃት ኣምላኽ ኪነብሩ ዚደልዩ ኺስደዱ እዮም» በሎ (2 ጢሞ. 3:12) ።
ንስኻስ መከራ ተሰኪምካዶ ትፈልጥ? እንተዀይኑስ፡ ንእግዚኣብሔር ድዩ? እንተዀይኑስ፡ ከመይ ገይርካ ኢኻ ምላሽ ሂብካ? ካብ ጳውሎስ ንማሃር!
