ኣብ ቃል ኣምላኽ ብዙሕ ኣጸጋሚ ፍቕድታት ኣሎ፡ ከምኡ እውን ንምግላጽ ወይ ንምርዳእ እውን ዜጸግሙ ትምህርቲታት ኣለዉ። ሃዋርያ ጴጥሮስ ነዚ ግምገማ እዚ ተሰማሚዑ፡ ብዛዕባ ጽሑፋት ሃዋርያ ጳውሎስ ኪዛረብ ከሎ፡ «ንምርዳእ ኣጸጋሚ» ምዃኖም ተዛሪቡ (2 ጴጥ. 3:15–16)። ስለዚ፡ ንመጽሓፍ ቅዱስ ብትዕግስቲ ኽንምርምር፡ ኣብ ትሕዝቶኡ ኽንሓስብ፡ «ፍቕዲ ብፍቕዲ» ድማ ትምህርቲ ጸጋ ኽንመሃር ኣሎና።
እቲ ኣብ ላዕሊ ዘሎ ሓሳብ ሓቂ ክነሱ፡ ብዙሕ ፍሉይ ነገራት ኣሎ፡ እቲ ዝበለጸ ድማ ሓሳብ ጳውሎስ ኣብ ቲቶስ 2:11–13 እዩ። እዚ ፍቕዲ እዚ ንክርስትና ግሩም ምሕጽር ወይ ምጥቕላል ይህበና፡ ነቲ ዝዓበየ መልእኽቲ መጽሓፍ ቅዱስ ድማ ይገልጽ። ንጹርነትን ግልጽነትን ቅዱሳት ጽሑፋት ንጹር ኣብነት እዩ። ጳውሎስ ንክርስትያናዊ መልእኽቲ ኣብ ሰለስተ ሓጺር ሓሳባት የጠቓልሎ፡ እዚኣቶም ድማ ዝሓለፈ፡ ሕጂ ዘሎን መጻኢን የጠቓልሉ።
እቲ ዝሓለፈ፡ «ጸጋ ኣምላኽ ንምድሓን ዜምጽእ ተገሊጹ እዩ እሞ።» እዚ ንቐዳማይ ምግላጽ ክርስቶስን ዕላማኡን ዜመልክት እዩ (እብ. 9:26)። ጸጋ ኣምላኽ ጐይታ የሱስ ናብ ዓለም ምስ መጸ ብምሉኡ ተገሊጹ። «ክርስትና ብዜምጽኦ እዩ ዚፍለጥ፡ ብዚረኽቦ ኣይኰነን» (ጄ. ኤን. ዳርቢ)። ስራሕ ክርስቶስ ኣብ መስቀል ኣምላኽ ካብ ሰብ ጽድቂ ከም ዘይደሊ ይገልጽ—እዚ እዩ እቲ ሕጊ ዝገበሮ—የግዳስ፡ ንሰብ ጽድቂ ኣዳልዩ እዩ። ግሩም ጸጋ፡ ነጻ «ውህበት ጽድቂ» (ሮሜ 5:17፡ ፊልጲ 3:9)። ምድሓን ን«ዅሉ ሰብ» ተገሊጹ እዩ። ንቤት እስራኤል ጥራይ ኣይተገደበን፡ ን«ዅሉ ህዝቢ» እዩ ነይሩ (ሉቃስ 2:10)። ንኸምዚ ዝኣመሰለ ጸጋና ዕለታዊ ኣድናቖትና ይዓቢ!
