ድሕሪቲ ናይ ጴጥሮስ ዘሕዝን ምውዳቕን ንጐይታ የሱስ ምኽሓድን፡ ብርግጽ ብስምዒት ዕምቆት ውድቀቱ ተደቊሱ፡ ንገሊኦም ብጾቱ፡ “ዓሳ ክገፍፍ እኸይድ ኣለኹ” በሎም። ንሱ ሕጂ ውድቕ ከም ዝኾነ፡ ነቲ ዝሰዓቦ ጐይታ ድማ ካልእ ኣገልግሎት ከም ዘይብሉ፡ ናብቲ ጐይታ ንደቀ መዛሙርቲ ዝጸውዖ ዝነበረ ናይ ቀደም ስራሑ ክምለስ ከም ዘለዎ ደምዲሙ ይኸውን።
ስለዚ ናብቲ ናይ ቀደም ስራሑ ክምለስ ወሰነ፡ ግናኸ በይኑ ኣይከደን። ሽዱሽተ ካልኦት ደቀ መዛሙርቲ፡ ብውሳነኡ ተጸልዮም፡ ምስኡ ክኸዱ ወሰኑ። ብርግጽ ባህርያት መሪሕነት ጴጥሮስ ኣብ ብጾቱ ሓያል ጽልዋ ገይሩ ነይሩ። “ዓሳ ንግፋፍ” ኣይበለን ምባል የድሊ። ውሳነኡ ናቱ ጥራይ ነይሩ፡ ግናኸ፡ እቲ ናብ ዓሳ ምግፋፍ ንምምላስ ዝነበሮ ጽንዓት ካብ ጴጥሮስ ንበይኑ ንላዕሊ ሰፊሕ ኣተገባብራ ነይርዎ።
እቲ ጐይታ የሱስ ብጸጋ ምምላስ እንተ ዘይተኣታተወ፡ እቲ ሃዋርያዊ ጉጅለ ናብ ሓደ ሲሶ ሓይሉ ምተሓተ። ይሁዳ ናብ ቦታኡ ኸይዱ ነይሩ፡ ጴጥሮስ ድማ ናብ ዓሳ ምግፋፍ ተመሊሱ ሽዱሽተ ካልኦት ድማ ምስኡ ወሲዱ ነይሩ፡ ዮሃንስ እውን ከይተረፈ። እቲ ጐይታ ብጸጋ ንምምላስ እንተ ዘይሰዓቦም፡ ክንደይ ከቢድ ምፍንጫል ምኾነ ነይሩ!
እቶም ብዝኾነ ይኹን መገዲ ኣብ ቅድሚት ዘለዉ፡ ብኸመይ ከም ዝኸዱ ዝያዳ ጥንቁቓት ክኾኑ ይግባእ፡ ከመይሲ ንኻልኦት፡ ንመሪሕነት ዝጥምቱዎም፡ ብቐሊሉ ክጸልዉ ይኽእሉ እዮም። “ንእግርኹም ቅኑዕ መገዲ ግበሩ፡ እቲ ሓንካስ ምእንቲ ከይሰሓብ” (እብ. 12:13) ተመኺርና ኣለና።
