ንክርስቶስ ዝኸፍአ የልቦን። እቲ ጸላኢ ነፍሳትና ብዘይ ምድሓናዊና ምዃኑ ንኣምላኽ ብቑዓት ኢና ብዝብል ሓሳብ ብምጥባር ናብ ክርስቶስ ከይንመጽእ እንተ ዘይክኢሉ፣ ንምድሓንና ኣዝዩ ሕማቕ ምዃንና ከነእምን ብዙሕ ግዜ ይፍትን። እዚ ግን ዘይከኣል እዩ፣ ከመይሲ «ክርስቶስ የሱስ ንሓጥኣን ኬድሕን ናብ ዓለም መጸ፣ ካብኣቶም ድማ ኣነ እቲ ቐዳማይ እየ» ይብል ጳውሎስ (1 ጢሞ. 1:15)።
እቲ ቐዳማይ ሓጥእ ድሒኑ ስለ ዝኾነ፣ ሓደ እኳ ተስፋ ኺቖርጽ ኣየድልዮን እዩ። «ሓጢኣት ኣብ ዝበዝሓሉ፣ ጸጋ ኣዝዩ እናበዝሐ ኸደ» (ሮሜ 5:20)። ኣምላኽ ንዝተሓቱን ንዝረኸሱ፣ ከምኡ’ውን ንጻድቃን ዝመስሉ ነፍሶም ዝሓሰቡ፣ ግናኸ ጽድቆም ኩሉ ኣብ ቅድሚኡ ርኹስ ከም ዝኾነ ዝተማህሩ (ኢሳ. 64:6) ጸጋኡ ኼርኢ ይሕጐስ። ካብ ብሕታዊ ምስክርነት ናይቲ ዝደሓነ ሰብ ንኻልኦት ንምጽላው ዝበለጸ ኣገባብ የልቦን። ባዶ ጽንሰ-ሓሳብ፣ ክሳዕ ክንደይ ሓቂ እንተኾነ’ውን፣ ኣይኣክልን እዩ። ሓደ ሰብ ነፍሳት ኪረክብ እንተ ደልዩ፣ ብሕታዊ ተመክሮ ናይ ምድሓን ጸጋ ኺህልዎ ኣለዎ። «ኣድሒኑኒ» ኺብል ምኽኣል፣ ንመልእኽቲ ሓይሊ ይህብ፣ ከምኡ’ውን እቲ ተዛራቢ ንዝተመከሮ ነገር ከም ዝምስክር ምስ ዝፈልጡ፣ ኣብ ልቢ እቶም ሰማዕቲ ምትእምማን ይፈጥር።
ሳኦል ዘጠርሴስ ንቤተ ክርስቲያን ኣምላኽ የሳድድ ነበረ፣ ግናኸ ሽዑ’ውን ልቢ ኣምላኽ ናብኡ ይኸይድ ነበረ ክሳዕ እዋን ጸጋኡ ንእኡ ዝግለጸሉ፣ ከምኡ’ውን ሳኦል እቲ ኣሳዳዲ ናብ ጳውሎስ እቲ ልኡኽ ክርስቶስ ዝቕየር። ንሳኦል ብሓይሊ ዝቐየሮ ጸጋ እዩ ነይሩ፣ ከምኡ’ውን ወጺኡ ወንጌል ኪሰብኽ ሓይሊ ዝሃቦ ጸጋ እዩ። ሎሚ ብዙሓት ፕሮፌሽናል ኣገልገልቲ ኣለዉ፣ ግናኸ ባዶ ፕሮፌሽናል ኣገልጋሊ ኣብ ቅድሚ ኣምላኽ ፍንፉን እዩ። ኣገልገልቲ ኣምላኽ ብፍቕሪ ክርስቶስ ኺመሓደሩ ኣለዎም። እዚ እዩ ንጳውሎስ ዝገልጾ ዝነበረ።
