ልቢ ሃና ብኣምልኾን ምስጋናን ንመንነት ኣምላኽን ንዝገበሮን ምሉእ ነበረ። ብዛዕባ ዓሰርተ ዝተፈላለዩ ባህርያት ኣምላኽ ተጸሚዳ ነበረት! ስብራኣ ብኣምላኽ ተጠቒሙ ሃና ብዛዕባ ሓይሉ (1 ሳሙ. 2:1)፣ ቅድስናኡ (2:2)፣ ፍሉይነት ኣምላኽ (2:2)፣ ኩሉ ምፍላጡ (2:3)፣ ፍትሒ ኣምላኽ (2:3)፣ ኩሉ ምኽኣሉ (2:4)፣ ዓቢ መሃቢ (2:5)፣ ልዑላዊ (2:6–8)፣ እሙን (2:9)፣ን ጽድቁ ኣብ ፍርዲ (2:10) ክትሓስብ ገበራ። ሃና ብዝገበሮ ጥራይ ዘይኮነስ፣ ብፍላይ ድማ ኣምላኽ ንኣኣ መን ከም ዝነበረ ተጸሚዳ ነበረት። ብስብራኣ ኣቢላ ሃና ጽንዓቱ ዘይናወጽ፣ ምጽንናዑ ዘይወዳደር፣ ሓይሉ ዘይስዓር፣ ፍቕሩ ዘይቅየር፣ ምሕረቱ ዘይውዳእ፣ ጋሻኡ ዘይሰበር፣ን ሰላሙ ዘይግለጽ ምዃኑ ተማህረት! ኣምላኽ ድማ ብሰለስተ ካልኦት ኣወዳድን ክልተ ኣዋልድን ባረኻ (2:20–21)።
እዛ እትጽሊ ኣደ ንወዳ ክጽሊ መሃረቶ፣ ሳሙኤል ድማ ኣብ እስራኤል ጸሎተኛ ነብዪ ኮነ (3:1–21)። ስብራ ሃና ንነፍሳ ጥዑም ንምግባር ጥራይ ዘይኮነስ፣ ንሓደ ሰብ ጸሎት ተባሂሉ ዝፍለጥ ነብዪ ኣምላኽ ንምምጻእ እውን ብኣምላኽ ተጠቕመ። ንምምላስ ጸለየ (7:5)፣ ኣብ ግዜ ምጕሃይ ጸለየ (8:6)፣ ብምልጃ ጸለየ (12:19–23)፣ን ብሓዘን ጸለየ (15:11)። ኩሉ እዚ ዝኾነ ኣዲኡ ስለ ዝተሰብረት እሞ ነቲ ስብራ ናብ እግዚኣብሔር ስለ ዝወሰደቶ እዩ!
ንስኻኸ? ብዛዕባ ንብዓትና ክንመሃሮ እንኽእል ዝበለጸ ነገር፣ ከምቲ ንሃናን ንብዙሓት ካልኦትን ዝገበሮ፣ ፍቑር ኣቦና ንነፍሲ ወከፍ ንብዓትና ከም ዝሰምዕ እዩ! ንሱ ንንብዓትካ ሎሚ ክሰምዖ እዩ!
