ህይወቶም እናፈርሑ፡ ህዝቢ ጊብዖን፡ እታ ርእሲ ኸተማ ሂዋውያን፡ ምስ እስራኤል ኪዳናዊ ርክብ ኪገብሩ ወሰኑ። ከም ራሓብ፡ ንየሆዋ “ኣምላኽ ኣብ ላዕሊ ኣብ ሰማያትን ኣብ ታሕቲ ኣብ ምድርን” ምዃኑ ዝኣመነትን ንርእሳ ኣብ ምሕረቱ ዘንበረትን ዘይኮነስ፡ ጊብዖናውያን ብተንኮል ገበሩ። ኣባስባስ ክዳውንትን ኣሳእን፡ ዝበስበሰ እንጌራ፡ ከምኡ’ውን ዝተቐደደ መጽረዪ ወይኒ ሒዞም መጹ እሞ፡ ንእስራኤላውያን ካብ ርሑቕ ሃገር ከም ዝመጹ፡ ምስ ተበገሱ ኸኣ ኩሉ ሓድሽ ከም ዝነበረ ነገሩዎም።
ንእግዚኣብሔር መምርሒኡ ከይሓተቱ፡ እያሱን መሳፍንቲ እስራኤልን ምስኦም ኪዳን ገበሩ፡ ኪነብሩ ኸኣ ፈቐዱሎም። ድሕሪ ሰለስተ መዓልቲ እስራኤላውያን ምስ መን ከም ዝተሓባበሩ ፈለጡ። ኣብ ልዕሊ መሳፍንቶም ኣንጐድጐዱ እሞ፡ ንጊብዖናውያን ኪቐትልዎም ተዳለዉ፡ እያሱን ገዛእትን ግና ኣዕገትዎም፡ ንኪዳን ሰላም ብስም የሆዋ ኣምላኽ እስራኤል ከም ዝተማሕለሉ ብምዝኽኻር ከኣ ኪትንክይዎም ከም ዘይከኣሉ ነገሩዎም።
ጊብዖናውያን ንእያሱ፡ “ኣብዱኻ ኢና” ኢሎምዎ ነበሩ። ሕጂ ህይወቶም ተናሓሓፈት፡ ግናኸ ንዘለኣለም ኣገልገልቲ ኪኾኑ እዮም! ዕንጨይቲ ኺቘርጹን ማይ ኪቐድሑን ነበሮም። ግናኸ ብግሩም መገዲ ኣምላኽ፡ እዚ ንጉባኤ እስራኤል ጥራይ ዘይኮነስ፡ “ንመሰውኢ እግዚኣብሔር” እውን ኪገብርዎ ነበሮም። ካብ ምርኮ ባቢሎን ዝተመልሱ ኣገልገልቲ ቤተ መቕደስ፡ ነቲ ንኣምላኽ ምግልጋል ዝረኸብዎ መሰል ዘኽበሩ ደኣ እዞም ጊብዖናውያን እዚኦም እዮም (ነህ. 3:7)።
