ዕለታዊ ብርሃን, 18 ሰነ: ነቲ መኽደን ከዓ ኣብ ልዕሊ ታቦት ግበሮ (ዘፀኣት 25:21–22)

ነቲ መኽደን ከዓ ኣብ ልዕሊ ታቦት ግበሮ። ... ኣብኡ ድማ ንኣኻ ኽግለፀልካ እየ።

ዘፀኣት 25:21–22

እቲ ናብታ ቕድስተ ቅዱሳን ዘእቱ መንገዲ።

ዕብራውያን 9:8

ኢየሱስ ደጊሙ ዓው ኢሉ ድምፂ ኣስምዐ፤ ነፍሱ ድማ ወፀት። እንሆ ኸዓ መጋረጃ ቤተ መቕደስ፥ ካብ ላዕሊ ኽሳዕ ታሕቲ ኣብ ክልተ ተቐደደ።

ማቴዎስ 27:50–51

ስለዙይ ኣሕዋተይ፥ ብደም ክርስቶስ ናብ ቅድስተ ቅዱሳን ንምእታው፥ መተኣማመኒ ረኺብና ኢና። እንኣትዎ ኸዓ በቲ መጋረጃ፥ ብሰብነቱ ዝተኸፍተ፥ ሓድሽን ህያውን ብዝኾነ መንገዲ ኣቢልና ኢና። ኻብ ክፉእ ሕሊና ምእንቲ ኽንነፅህ፥ ልብና ተነፂግና፥ ሰብነትና ብንፁህ ማይ ሓፂብና፥ ብቕኑዕ ልብን ብሙሉእ እምነትን፥ ናብ እግዚኣብሄር ንቕረብ።

ዕብራውያን 10:19–20, 22

እምበኣር ምሕረት ምእንቲ ኽንቕበል፥ ረድኤት ብዘድልየና ጊዜውን፥ ፀጋ ምእንቲ ኽንረክብ፥ ናብቲ ፀጋ እንረኽበሉ ዙፋን እግዚኣብሄር፥ ብምትእምማን ንቕረብ።

ዕብራውያን 4:16

ብኸምኡ ብፀጋኡ ይፀድቁ እዮም እሞ። እግዚኣብሄር ከዓ፥ ፅድቁ ምእንቲ ኸርኢ፥ ነቲ ቕድም ዝተገብረ ሓጢኣት፥ ብመለኮታዊ ትዕግስቱ ይቕረ ኢሉ፥ ብእምነት ዝርከብ፥ ብደሙ ስርየት መርከቢ ገይሩ ንእኡ ኣቘሞ።

ሮሜ 3:24–25

ክልቴና ብእኡ ጌርና፥ ብሓደ መንፈስ፥ ናብ ኣብ እንኣቱ ኢና እሞ።

ኤፌሶን 2:18

ክንዲ ፍረ ኣድሪ እትኣክል እምነት እንተ ሃልያትኩም።

ማቴዎስ 17:20

ባርቅ ድማ “ምሳይ እንተ ኼድኪ፥ ክኸይድ እየ፤ ምሳይ እንተ ዘይኬድኪ ግና ኣይከይድን እየ” በላ። በታ መዓልቲ እቲኣ ድማ፥ እግዚኣብሄር ንኢያቢስ፥ ንጉስ ከነዓን።

መሳፍንት 4:8, 23

ግና ብመዓልቲ ኸይገብሮ፥ ንቤት ኣቦኡን ንሰብ እታ ኸተማን ስለ ዝፈርሐ፥ ብለይቲ ገበሮ። ጌዴዎን ድማ ንእግዚኣብሄር “ንእስራኤል ብኢደይ ክተድሕኖም እንተ ዄንካ ... በቲ ፀምሪ ሓደሻዕ ክፍትን ፍቐደለይ። ... ኣምላኽ ድማ በታ ለይቲ እቲኣ ኸምኡ ገበረ።

መሳፍንት 6:27, 36, 39–40

ንስመይውን ኣይከሓድካዮን። ስለዙይ ሓደኳ ኽዓፅዎ ዘይኽእል፥ ክፉት ኣፍ ደገ ሂበካ ኣለኹ።

ራእይ 3:8

ንመዓልቲ ኣናእሽቲ ነገር ዝንዕቕ መን እዩ?

ዘካርያስ 4:10

ኣሕዋትና፥ እምነትኩም በሊፃ እናዓበየት ትኸይድ ስለ ዘላ፥ እታ ኣብ ንስንሳትኩም ዘላ፥ ናይ ነፍሲ ወከፍኩም ፍቕሪውን እናበዝሐት ትኸይድ ስለ ዘላ።

2ይ ተሰሎንቄ 1:3

ሃዋርያት ድማ ንጐይታ “እምነት ወስኸና” በልዎ።

ሉቃስ 17:5

ኣነ ንእስራኤል ከም ኣውሊ ክኾኖ እየ፤ ከም ፅቡቕ ዕምበባ ኽዕምብብ እዩ፤ ከም ኣእዋም ሊባኖስ ከዓ ሰራውር ክሰድድ እዩ። ጨናፍሩ ይዝርጋሕ፤ ፅባቐኡ ኸም ኣውሊዕ፥ መዓዛኡ ኸም ሊባኖስ ክኸውን እዩ።

ሆሴዕ 14:5–6