1 ሃዋርያትን እቶም ኣብ ይሁዳ ዝነበሩ ኣሕዋትን፥ ኣህዛብ፥ ንቓል እግዚኣብሄር ከም ዝተቐበሉ ሰምዑ። 2-3 ጴጥሮስ ናብ ኢየሩሳሌም ምስ ተመለሰ፥ እቶም ካብ ግሩዛት ወገን ዝኾኑ ኣመንቲ ኣይሁድ “ንስኻ ናብ ዘይተገረዙ ሰባት ኣቲኻ፥ ምስኣቶም በሊዕኻ ኢኻ” ኢሎም ነቐፍዎ። 4 ጴጥሮስ ድማ፥ ካብ መጀመርታ ጀሚሩ ኽነግሮም ጀመረ፤ ከምዙይ ድማ በሎም፦ 5 “ኣነ ኣብ ከተማ ኢዮጴ ኽፅሊ እንተለኹ፥ ተመሰጥኩ እሞ፥ ራእይ ረአኹ፤ እንሆ ኸዓ በርባዕተ መዓዝኑ ዝተትሓዘ ዓብዪ መጋረጃ ዝመስል፥ ካብ ሰማይ ወሪዱ ናባይ መፀ። 6 ናብኡ ኣትኲረ እንተ ጠመትኩ፥ ኣርባዕተ መሓውር ዘለዎም እንስሳን ኣራዊትን፥ ለመም ዝብሉን፥ ኣዕዋፍ ሰማይን ረአኹ። 7 ‘ጴጥሮስ፥ ተስእ፤ ሓሪድካ ብላዕ’ ዝብለኒ ድምፂ ኸዓ ሰማዕኹ። 8 ኣነ ግና ‘ጐይታይ፥ ርኹስ ወይ ዘፀይፍ ከቶ ኣብ ኣፈይ ኣትዩ ኣይፈልጥን እዩ እሞ፥ ኣይኸውንን’ በልኩ። 9 ንኻልኣይ ጊዜ ኸዓ ‘ነቲ እግዚኣብሄር ዘንፅሆ ንስኻ ኣይተርክሶ’ ዝብል ድምፂ፥ ካብ ሰማይ ሰማዕኹ። 10 እዝ ነገርዙይ ሰለስተ ጊዜ ኾነ፤ መሊሱ ድማ፥ ኵሉ ናብ ሰማይ ተስሓበ። 11 እንሆ ኸዓ ሽዑ፥ ሰለስተ ሰባት ካብ ቂሳርያ ናባይ ተልኢኾም፥ ኣብ ጥቓ እታ ኣነ ዝነበርክዋ ገዛ ደው ኢሎም ነበሩ። 12 መንፈስ ቅዱስ ከዓ፥ እንተይተጠራጠርኩ ምስኣቶም ክኸይድ ነገረኒ፤ እዞም ሽዱሽተ ኣሕዋት ድማ ምሳይ ከዱ፤ ናብ እንዳ ቆርኔሌዎስውን ኣተና። 13-14 ንሱ ኸዓ፥ መልኣኽ ኣብ ቤቱ ደው ኢሉ፥ ‘ናብ ኢዮጴ ለኣኽ እሞ፥ ነቲ ጴጥሮስ ዝበሃል ስምኦን ፀዊዕኻ ኣምፅኣዮ፤ ንስኻን ኵሉ ቤትካን እትድሕኑሉ ቓል፥ ንሱ ኽነግረካ እዩ’ ኽብሎ እንተሎ ኸም ዝረአየ ነገረና። 15 ክዛረብ ምስ ጀመርኩ ድማ፥ ከምቲ ቕድም ኣባና ዝወረደ፥ መንፈስ ቅዱስ፥ ኣብኣቶምውን ወረደ። 16 ሽዑ ነቲ ‘ዮሃንስ ብማይ እዩ ዘጥመቐ፤ ንስኻትኩም ግና፥ ብመንፈስ ቅዱስ ክትጥመቑ ኢኹም’ ዝበሎ ቓል ጐይታ ዘከርኩ። 17 እምበኣር ከምቲ ንኣና ብጐይታ ብኢየሱስ ክርስቶስ ምስ ኣመንና ዝሃበና፥ ኣምላኽ ማዕረና ገይሩ ውህብቶ ኻብ ሃቦም፥ ንእግዚኣብሄር ክኽልክሎ ዝኽእል ኣነ መን እየ!” በለ። 18 ነዙይ ምስ ሰምዑ ስቕ በሉሞ፥ “እምበኣርከስ እግዚኣብሄር ንኣህዛብ ድማ፥ ንህይወት ዝኸውን ንስሃ ሂብዎም ኣሎ” እናበሉ ንእግዚኣብሄር ኣመስገኑ።
19 እቶም ብሰንኪ እቲ ኣብ እስጢፋኖስ ዝበፅሐ መከራ፥ ዝተበተኑ ሰባት ግና፥ ክሳዕ ፊንቂስን ቆጵሮስን ኣንፆኪያን ከዱ፤ ነቲ ቓል ድማ ንኣይሁድ እንተ ዘይኮይኑ፥ ንሓደኳ ኣይነግሩን ነበሩ። 20 ገሊኣቶም ግና ሰብ ቆጵሮስን ሰብ ቀርኔንን ነበሩ፤ እዚኣቶም ናብ ኣንፆኪያ መፂኦም፥ ብዛዕባ ጐይታና ኢየሱስ ሰበኹሎም። ነቶም ግሪካውያን እንተይተረፈ ነገርዎም። 21 ኢድ ጐይታውን ምስኣቶም ነበረ፤ ብዙሕ ዝቝፅሮም ሰባት ድማ፥ ኣሚኖም ናብ ጐይታ ተመለሱ።
22 እዝ ወረ እዙይ ከዓ፥ ኣብታ ኣብ ኢየሩሳሌም ዘላ ቤተ ክርስቲያን ተሰምዐ፤ ንበርናባስ ድማ ናብ ኣንፆኪያ ለኣኽዎ። 23 ንሱ ኣብኡ ምስ በፅሐ፥ ፀጋ እግዚኣብሄር ሪኡ ተሓጐሰ፤ ብምሉእ ልቦም ብእግዚኣብሄር ፀኒዖም ክነብሩ ድማ መዓዶም። 24 ንሱ መንፈስ ቅዱስን እምነትን ዝመልኦ ሕያዋይ ሰብ ነበረሞ፤ ብዙሕ ህዝቢ ድማ ናብ ጐይታ ተመለሰ። 25 በርናባስ ካብኡ ወፂኡ፥ ንሳውል ክደልዮ ናብ ጠርሴስ ከደ። 26 ምስ ረኸቦ ናብ ኣንፆኪያ ኣምፅኦ፤ ኣብታ ቤተ ክርስቲያን ከዓ፥ ዓመት ምሉእ ሓቢሮም ነበሩ፤ ንብዙሕ ህዝቢ እውን መሃሩ፤ እቶም ደቀ መዛሙርት ድማ ንፈለማ ጊዜ፥ ኣብ ኣንፆኪያ ክርስቲያን ተብሂሎም ተፀውዑ።
27 በተን መዓልቲታት እቲኣተን፥ ነቢያት ካብ ኢየሩሳሌም ናብ ኣንፆኪያ ወረዱ። 28 ሓደ ኻብኣቶም ኣጋቦስ ዝስሙ ተሲኡ፥ ኣብ ኵሉ ዓለም ብርቱዕ ጥሜት ከም ዝኸውን፥ ብመንፈስ ቅዱስ ተዛረበ፤ እዙይ ዝኾነ ድማ ብዘመን ቀላውዴዎስ ቄሳር እዩ። 29 ስለዙይ እቶም ደቀ መዛሙርት፥ ነፍሲ ወከፍ ከከም ዓቕሞም፥ ነቶም ኣብ ይሁዳ ዘለዉ ኣሕዋት፥ ረድኤት ክሰዱሎም መደቡ። 30 ነቲ ዝተዋፅአ ገንዘብ ድማ፥ ብኢድ በርናባስን ሳውልን ገይሮም፥ ናብቶም ሽማግለታት ሰደድዎ።
ግብሪ ሃዋርያት 11 · ትመ15
ዮሴፍ ሌዋዊ ነበረ፡ እቲ ኣምላኽ ንምግልጋሉ ዝመረጾ ነገደ። ሕጂ ደቀ መዝሙር ኮይኑ፡ ኣብ ቆጵሮስ ዝነበሮ መሬት ሸጠ እሞ እቲ ዝረኸቦ ገንዘብ ናብ ሃዋርያት ኣምጽአ። ንሳቶም ከኣ ወዲ ምጽንናዕ—በርናባስ—እቲ ንሕና እንፈልጦ ስም ክጽውዕዎ ጀመሩ። ኋላ ደኣ ሳውል ዘጠርሴስ ናብ የሩሳሌም ምስ መጸ፡ እቶም ኣብኡ ዝነበሩ ምእመናን ኣይኣመንዎን ፈርህዎ ድማ። ስለዚ በርናባስ ናብ ሃዋርያት ወሰዶ እሞ ከመይ ከም ዝደሓነን ብኣምላኽ ከም ዝተጠቕመን ነገሮም። ንኣብነት በርናባስ ንስዓብ እሞ ንጐይታ ዘሎናን እንነብሮን ኩሉ ንሃቦ እሞ ንኻልኦት ንምብራታዕ ንነብር!
ኣብ ግብሪ ሃዋርያት 11 በርናባስ፡ ጽቡቕ ሰብኣይ፡ መንፈስ ቅዱስን እምነትን ዝመልኦ፡ ካብ የሩሳሌም ናብ ኣንጾኪያ ተላእከ፡ ኣብኡ ኣህዛብ ይድሕኑ ነበሩ። ንሱ ምብራታዕን ሓገዝን ሃበ እሞ ንሳውል ከኣ ናብኡ ክመጽእ ገበሮ። እዞም ክልተ ብሓንሳብ ንብዙሓት ሰባት ኣብ ኣንጾኪያ ንሓደ ዓመት መሃሩ። ክርስትያናት ንጐይታ ብሓንሳብ ምግልጋል ክንደይ ጽቡቕ ኰን እዩ!
ካብ ኣንጾኪያ ናብ የሩሳሌም ንሓገዝ ጥሜት ገንዘባዊ ህያብ ካብ ኣሕዋት ምስ ኣምጽኡ፡ ወዲ ሓው በርናባስ ዮሃንስ ማርቆስ ምሳታቶም መጸ። ኋላ ደኣ መንፈስ ቅዱስ ንበርናባስን ሳውልን ከም ሚስዮናውያን ምስ ለኣኾም፡ ዮሃንስ ማርቆስ ንምሕጋዝ ምሳታቶም ከደ። ኣብ ቆጵሮስ፡ ሃገር በርናባስ፡ ምስ ሰርሑ፡ ጳውሎስ—እቲ ሓድሽ ስም ኣስተብህሉ—ንበርናባስን ናብ ምድሪ ምስ ቀጸሉ፡ ማርቆስ ሓዲግዎም ናብ የሩሳሌም ናብ ቤቱ ከደ። ጳውሎስን በርናባስን ብሓንሳብ ብጸበባን ስደት ክቕጽሉ ጸኒሖም፡ ኣብ መወዳእታ ናብ ኣንጾኪያ ተመልሱ። ጳውሎስን በርናባስን ካልኦትን ድማ ንሓደ ኣገዳሲ ትምህርታዊ ሕቶ ምስ ሃዋርያትን ሽማግለታትን ንምብራህ ናብ የሩሳሌም ተላእኩ። ከም በርናባስ ንኹን፡ ኣባራታዕቲ፡ ምስ ካልኦት ብሓንሳብ ዝሰርሑን ካልኦት መሪሕነት ክወስዱ ዝቕበሉን!
