ዮናስ ፈለማ ፍቓድ ኣምላኽ ምዃኑ ዝፈልጦ ነገር ክገብር ኣበየ። እዚ ንኹላትና ሓቂ ኣይነበረንዶ? ግናኸ ኣምላኽ ንዮናስ ናብ ልቡ መለሶ እሞ ኣድሓኖ! ሰባት ንምድሓኖም ንዕዮ ጐይታና የሱስ ክርስቶስ እንተ ዝቕበሉ ነይሮም፣ ክንደይ ቅልጡፍ ካብ መሪር ህይወት ምድሓን ምረኸቡ ነይሮም።
ዮናስ ከኣ ንጐይታ ዘከረ እሞ “ካብ ከብዲ ዓሳ ናብ የሆዋ ኣምላኹ ጸለየ … [እሞ ኣምላኽ] ህይወቱ ኻብ ጕድጓድ ኣውጽኣ” (2:1, 6)። ዮናስ ሓጢኣቱ ምስ ተናዘዘን ንኣምላኽ ምስ ተኣመነን፣ ኣምላኽ “ንዓሳ ኣዘዞ እሞ ንዮናስ ናብ ንቑጽ ምድሪ ኣውጽኦ” (ቍ. 10)።
ኣምላኽ ብጸጋኡ፡ ንዕኡ ንምእዛዝ ካልኣይ፡ ሳልሳይን ካብኡ ንላዕሊ ዕድል ይህበና። እዚ ግዜ እዚ ዮናስ ንኣምላኽ ኣይሓተተን፡ ግናኸ “ተንስአ እሞ ብቓል የሆዋ ናብ ነነዌ ኸደ” (3:3)። ኣብኡ ኸኣ ብጐደናታት ነነዌ ኣቢሉ ንኸቢድ መልእኽቱ ኣወጀ። ብኹሉ ግርማ ተሰምዐ እሞ “ሰባት ነነዌ ንኣምላኽ ኣመኑ” (ቍ. 5)። ክንደይ ተኣምር! ክንደይ ብዙሓት ብስብከት ሓደ ሰብ ዝተዋረዱ!
ኣብቲ ኣምላኽ ክንህሉ ዝደልየና ቦታ፡ ንሱ ክንገብሮ ዝደልየና ነገር ክንገብር ከለና ኢና ንኣምላኽ ዝበለጸ እንጠቕሞ። ንሱ ኣበይን መዓስን ከነገልግል ከም ዘሎና ይፈልጥ—ኣብ ቤት ጽሕፈት፡ ኣብ ፋብሪካ፡ ኣብ ቤት ትምህርቲ፡ ኣብ ገዛ፡ ወይ ኣብ ዝኾነ ይኹን ቦታ። ኣብኡ ክንህሉ ፍቓዱ እንተኾይኑ፡ ሽዑ መንፈሳዊ ጠቓሚ ንምዃን ኣብኡ ክንህሉ ኣሎና። ኣምላኽ ንዮናስ ኣብ ነነዌ ክኸውን ደለየ። ንኣኻኸ ኣበይ ይደልየካ? ኣብ ቅኑዕ ቦታ ኣብ ቅኑዕ ግዜ እንተሃለና እውን፡ እንታይ ክንብል ወይ ክንገብር ከም ዘሎና ብቐጻሊ መሪሕነት መንፈስ ቅዱስ የድልየና። ነዚ ሓቂ እዚ ንፈልጦ ንኸውን፡ ግናኸ ኣብ ግብሪ ምውዓሉ ኣገዳሲ እዩ!
