ኣብ ታሪኽ ኣብርሃም ኣብ ዘፍጥረት 18፡ ኣዒንቱ ኣንቃዕሪሩ ሰለስተ ሰብኡት ኣብ ጥቓኡ ደው ኢሎም ከም ዝነበሩ ኣስተብሃለ። እዚ ኣጋጣሚ ኣይነበረን። ጐይታ ናብ ሰዶም ንምኻድ ብድንኳን ኣብርሃም ክሓልፍ ኣየድለዮን ነበረ፣ ግናኸ ምስ ኣብርሃም ቀጠሮ ነበሮ። ጐይታ ናብ ድንኳን ኣብርሃም ካብ ምኻድ ይቕረ ኢሉ፡ ኣብርሃም ናብኦም እናጐየየ ኺረኽቦም ከሎ፡ ኣብ ጥቓኡ ደው ብምባል ፍቕሩ ንጐይታ ኺገልጽ ፈቐደሉ። ኣብርሃም ናብ ሓደ ጐድኒ ኺሓልፉን ርእሶም ኬሐድሱን ዓደሞም።
ኣብ ጉዳይ ደቀ መዛሙርቲ ኣብ ጃልባ፡ የሱስ ናብ ካልእ ጐድኒ ባሕሪ ቐዲሙ ለኣኾም፡ ድሕሪኡ ድማ ንሱ ባዕሉ ነቲ ባሕሪ ኺሰግር ተበገሰ—ጃልባ ኣየድለዮን ነበረ። ናብ ጃልባኦም ቐጥታ ኺኸይድ ይኽእል ነበረ፡ ግናኸ ኣብ ጥቓኦም ተመላለሰ እሞ ኺርእይዎ ፈቐደሎም። ምግላጹ ኣብ ፈለማ ኣፍረሖም፡ ግናኸ ቃላቱ ጐይታኦም ከም ዝኾነ ምስ ተረድኡ፡ ፍርሖም ኣህደኣሎም። ኣብ ወንጌል ዮሃንስ፡ “ብፍቓዶም ናብ ጃልባኦም ተቐበልዎ” (6:21) ኢልና ንምብብ።
ድሕሪ ትንሳኤኡ፡ ጐይታ የሱስ ምስቶም ክልተ ደቀ መዛሙርቲ ኣብ መገዲ ኤማሁስ ተመላለሰ። ናብታ ኸተማ ምስ በጽሑ፡ ቐጺሉ ኺኸይድ ከም ዝደለየ ኣምሰለ። ንሱ መን ምዃኑ ገና ከይፈለጡ፡ ናብኦም ዓደሞም እሞ ንሱ ድማ ኣዒንቶም ከፈተሎም እሞ ንርእሱ ኣፍለጠሎም። ካብ ኣዒንቶም ተሰወረ፡ ግናኸ እዚ ናብ የሩሳሌም ተመሊሶም ምስ ካልኦት ደቀ መዛሙርቲ ኺሕጐሱ ኣተባብዖም።
ንጐይታ ናብ ኩነታትካ ትዕድሞዶ? ከም ኣብርሃም፡ ንዕኡ ኸነገልግል ይፈቕደልና እሞ፡ ብሓቂ ድማ፡ ከምኡ ኽንገብር ከሎና ንሕና ኢና እንሕደስ። ከም ደቀ መዛሙርቲ፡ ኣብ ፈተናታትና ብፍቓድና ንዕኡ ኽንቕበሎን ኣብ ምዝርራብና ኸነእትዎ ንኽእል ኢና፡ “ናብ ኣምላኽ ቅረቡ እሞ ንሱ ድማ ናባኻትኩም ኪቐርብ እዩ” (ያዕ. 4:8)። ንጐይታ ዓድሞ እሞ ንሱ ድማ ልብኻ ኬሐጕስ እዩ።
