ኣምላኽ ንዮሴፍ ብሓያል መገዲ ተጠቒሙ ንግብጺ ጥራይ ዘይኮነስ፡ ነቶም ብዘይፍትሓዊ መገዲ ዝሓዝዎ ኣሕዋቱ እውን ኣድሒኑን ባሪኹን! ኩሉ ምስ ተፈጸመ፡ ንኣሕዋቱ፡ “ንስኻትኩም ንዓይ ክትጎድኡኒ ደሊኹም ነይርኩም፤ ኣምላኽ ግን ንብዙሓት ህዝቢ ንምድሓን … ንጽቡቕ ደልይዎ” በሎም። ኣሕዋት ዮሴፍ ንዮሴፍ ዝምልከት ትልሚ ነበሮም፡ ኣምላኽ ድማ ትልሙ ይፍጽም ነበረ!
ናይ ዮሴፍ ዛንታ ኣብ ወንጌላት ይርከብ። ሰባት ንጐይታና የሱስ ክቐትልዎ ተማኺሮም (ማቴ. 26:3–4) “ብዘይሕጋውያን ኣእዳው” ክሰቕልዎ ኣሕሊፎም ሃብዎ። ይኹን እምበር፡ “ብዝተወሰነ ዕላማን ብቅድመ ፍልጠት ኣምላኽን” እዩ ተፈጺሙ (ግብ. 2:23)። ብሓቂ፡ ኣይሁዳውያን መራሕቲ ነቲ እኩይ ተግባሮም ድሕሪ በዓል ፋስጋ ንምፍጻም ተማኺሮም ነይሮም፡ ምእንቲ ኣብቶም ኣብ የሩሳሌም ንበዓል ዝተኣከቡ ህዝቢ ዕግርግር ከይኸውን። ኣምላኽ ግን ነዚ ኣፍሪስዎ፡ ምኽንያቱ ክርስቶስ ፋስጋ በጊዕ ስለ ዝነበረ፡ ኣብ እዋን በዓል ክመውት ነይርዎ (ማቴ. 26:5፤ 1 ቈረ. 5:7)። ኣምላኽ ሉኡላዊ እዩ፤ ጽልኢ ሰብ ፍቓዱ ምስ ፈጸመ እውን፡ ንዘለኣለማዊ በረኸትና ፍቓድ ኣምላኽ እዩ ዝጸንዕን ዝስዕርን። እዚ ዓብዪ ምስጢር እዩ፡ እኩይ ፍቓድ ሰብ ብሉኡላውነት ኣምላኽ ንኽብሩን ንበረኸትናን ክጥቀመሉ፡ ሰብ ግን ሓራ ኮይኑ፡ ሮቦት ወይ ኣሻዂላ ከም ዘይኮነ። ከምቲ ተጻሒፉ ዘሎ፡ “ብሓቂ ቊጥዓ ሰብ ክውድሰካ እዩ” (መዝ. 76:10)።
ሰብ ከምቲ ካብ መዓልታዊ ተመክሮና እንፈልጦ፡ ውሳነታት ንምግባር ሓራ እዩ፡ ግን ምርጫታትና ብጸጋ እንተዘይተሰዓረ ኩሉ ግዜ ንኣምላኽ ዝጻረር ክኸውን እዩ። ኣሕዋት ዮሴፍ ክጸልእዎን ክቐትልዎን እንተደለዩ እውን (ዘፍ. 37:4)፡ ኣምላኽ “ሓደ ሰብ ቅድሚኦም ለኣኸ” (መዝ. 105:17)፡ “ብዙሓት ህዝቢ ንምድሓን” ሓቂ ኮይኑ ጸኒሑ። ከምዚ ዝኣመሰለ ኣምላኽ ምሉእ እምነትና ይሓትት።
