ጐይታ ቀረባ እዩ — መስከረም 22, 2026: መዝሙር 104

¹ ኦ ነፍሰይ፥ ንእግዚኣብሄር ባርኺ፤ ኦ ጐይታ ኣምላኸይ፥ ንስኻ የመና ዓብዪ ኢኻ፤ ግርማን ክብርን ለበስካ። ² ንብርሃን ከም ልብሲ ለበስካዮ፤ ንሰማይ ከም ድንኳን ዘርጋሕኻዮ፤ ³ ንኣዳራሹ ብማያት ዝሓንፅ፥ ሰረገላኡ ኸዓ ደመና ዝገብር፥ ብኽንፊ ንፋስ ዝኸይድ፥ ⁴ ንመላእኽቱ መንፈስ፥ ንኣገልገልቱ ሃልሃልታ ሓዊ ዝገብር፥ ⁵ ንዘለኣለም ከይትናወፅ፥ ንምድሪ ኣብ መሰረታ ኣፅንዓ። ⁶ ብመዓሙቕ ከም ክዳን ከደንካያ፤ ማያት ኣብ ልዕሊ እምባታት ይቖሙ፤ ⁷ ካብ መግናሕትኻ ዝተልዓለ ይሃድሙ፤ ብድምፂ ነጐድጓድካ ይድንግፁ። ⁸ ናብ እምባታት ይድይቡ፤ ናብቲ ዘዳሎኻሎም ስፍራ ናብ ቈላታት ይወርዱ። ⁹ ተመሊሶም ንምድሪ ምእንቲ ኸይሽፍንዋስ፥ ከይሓልፍዎውን ወሰን ገበርካሎም። ¹⁰ ዓይኒ ማያት ናብ ቈላታት ይልእኽ፤ ብመንጎ እምባታት ማያት ይሓልፉ፤ ¹¹ ንዅሉ እንስሳ በረኻ ድማ የስትዩ፤ ኣእዱግ በረኻውን ፅምኣቶም የርውዩ። ¹² ኣዕዋፍ ሰማይውን ኣብኣቶም ይሰፍራ፤ ኣብ ማእኸል ስንጣቕ እቲ እምኒ ድማ፥ ድምፀን የስምዓ። ¹³ ንእምባታት ካብ መዛግብትኻ ተስትዮም፥ ምድሪ ብፍረ ተግባርካ ትፀግብ። ¹⁴ ካብ ምድሪ፥ እኽሊ ምእንቲ ኸውፅእ፥ እቲ ለምለምውን ንጥቕሚ ወዲ ሰብ፥ ንእንስሳ ድማ ሳዕሪ ተብቍል። ¹⁵ ወይኒ ንልቢ ሰብ የሐጕስ፤ ዘይቲውን ንገፅ የብርህ፤ እኽሊውን ንብርኪ ሰብ የጠንክር። ¹⁶ ኣእዋም እግዚኣብሄር፥ እቶም ንሱ ዝተኸሎም፥ ፅሕድታት ሊባኖስ ክፀግቡ እዮም። ¹⁷ ኣዕዋፍ ኣብኡ ይዋለዳ፤ ሰፈር ራዛውን ጐረቤታቶም እዩ። ¹⁸ ነዋሕቲ እምባታት ንዋልያታት፥ ኣኻውሕውን መዕቘብ ጊሐታት እዮም። ¹⁹ ንወርሒ መፍለዪ ጊዜታት ገበርካ፤ ፀሓይውን ዝዓርበሉ ይፈልጥ እዩ። ²⁰ ፀልማት ተምፅእ፤ ለይቲውን ይኸውን፤ ኵሎም ኣራዊት በረኻ ብኡኡ ይወፁ። ²¹ ሽደናት ኣንበሳ ኽነጥቑ ይጓዝሙ፤ ምግቦም ድማ ኻብ እግዚኣብሄር ይደልዩ። ²² ፀሓይ ምስ በረቐት ይእከቡ፤ ኣብ ጐጕድጓዶም ድማ ይድቅሱ። ²³ ሰብ ናብ ተግባሩ ይወፍር፤ ክሳዕ ዝመሲ ድማ እናሰርሐ ይውዕል። ²⁴ ኦ ጐይታ፥ ግብርካ የመና ዓብዪ እዩ፤ ንዅሉ ድማ ብጥበብ ገበርካዮ፤ ምድሪ ኸዓ ብፍጡራትካ መልአት። ²⁵ እዛ ባሕሪ እዚኣ ዓባይን ገፋሕን እያ፤ ኣብኡ ኸዓ ቝፅሪ ዘይብሎም ዓበይትን ኣናእሽቱን ዝንቐሳቐሱ እንስሳታት ኣለዉ። ²⁶ ኣብኡውን መራኽብ ይኸዳ። እቲ ንስኻ ዝፈጠርካዮ ሌዋታን፥ ኣብኡ ይፃወት። ²⁷ እዚኣቶም ኵሎም ምግቦም በብጊዜኡ ኽትህቦም፥ ንኣኻ ብተስፋ ይፅበዩ። ²⁸ ምስ ሃብካዮም ይእከቡ፤ ኢድካ ትዝርግሕ፤ ካብ ፅቡቕ ነገር ድማ ይፀግቡ። ²⁹ ንስኻ ገፅካ ምስ መለስካ ግና ይድንግፁ፤ እስትንፋሶም ተውፅእ እሞ ይሞቱ፤ ናብ መሬቶምውን ይምለሱ። ³⁰ መንፈስካ ትልእኽ፥ ንሳቶምውን ይፍጠሩ፤ ንገፅ ምድሪ እውን ትሕድስ። ³¹ ክብሪ እግዚኣብሄር ንዘለኣለም ይኹን፤ እግዚኣብሄር ብስራሑ ደስ ይብሎ። ³² ንምድሪ ይጥምታ፤ ክትንቅጥቀጥውን ይገብር፤ ንእምባታት ይነኽኦም፤ ንሳቶምውን ይትክዩ። ³³ ብህይወተይ እንተለኹ ንእግዚኣብሄር ክዝምር እየ፤ ብዝነብረሉ ዅሉ ዘመንውን ንኣምላኸይ ክዝምር እየ። ³⁴ ቃለይ ንእኡ ይጥዓሞ፤ ኣነውን ብእግዚኣብሄር ደስ ክብለኒ እዩ። ³⁵ ሓጥኣን ካብ ምድሪ ኽጠፍኡ እዮም፤ ዓመፀኛታትውን ደጊም ኣይህልዉን። ኦ ነፍሰይ፥ ንእግዚኣብሄር ባርኺ፤ ሃሌ ሉያ።

¹ ንእግዚኣብሄር ኣመስግንዎ፤ ስሙውን ፀውዑ፤ ግብርታቱውን ንኣህዛብ ንገሩ። ² ኣመስግኑ፤ ዘምሩሉ፤ ኵሉ ተኣምራቱውን ተናገሩ። ³ ብቅዱስ ስሙ ተመክሑ፤ እቲ ንእግዚኣብሄር ዝደሊ ልቢ ይተሓጐስ። ⁴ ንእግዚኣብሄር ድለይዎ፥ ክትብርትዑ ኢኹም፤ ኵልሻዕውን ገፁ ድለዩ። 5-6 ኣቱም ዘርኢ እቲ ባርያ እግዚኣብሄር ዝኾነ ኣብርሃም፥ ኣቱም ሕሩያቱ ውሉድ ያእቆብ፥ ዝገበሮ መስተንክር ግብርታቱን ተኣምራቱን፥ ካብ ኣፉ ዝወፀ ፍርዱን ዘክሩ። 7 ንሱ እግዚኣብሄር ኣምላኽና እዩ፤ ፍርዱውን ኣብ ኵሉ ምድሪ እዩ። 8 ናይ ዘለኣለም ኪዳኑን፥ እቲ ኽሳዕ ሽሕ ትውልዲ ዝኣዘዞ ቓሉን ዘከረ። 9 ነቲ ንኣብርሃም ዝገበሮን፥ ነቲ ንይስሓቅ ዝመሓሎን፥ 10 ንያእቆብ ስርዓት ክኸውን፥ ንእስራኤል ድማ ኺዳን ዘለኣለም ክኸውን ኣፅንዖ። 11 ከምዙይ ድማ በለ፦ “ንኣኻ ምድሪ ከነዓን፥ ብፅሒት ርስትኻትኩም ክትኮነኩም ክህብ እየ።” 12 እዙይ ዝኾነ ንሳቶም ስደተኛታት፥ ብቝፅሪውን ውሑዳት ሰባት፥ እንተለዉ እዩ። 13 ካብ ህዝቢ ናብ ህዝቢ፥ ካብ መንግስቲ እውን ናብ ካልእ ህዝቢ ሓለፉ። 14-15 “ነቶም ዝቐባእኽዎም ኣይትንክእዎም፤ ንነቢያተይ ድማ ኽፉእ ኣይትግበርዎም” ኢሉ፥ ሰብ፥ ግፍዒ ኽፍፅመሎም ኣይፈቐደን። 16 ምእንትኣቶም ንነገስታት ገሰፀ፤ ኣብ ልዕሊ ምድሪ ጥሜት ኣምፅአ፤ ንዅሉ ሓይሊ እኽሊ ኣጥፍአ። 17 ቀቅድሚኣቶም ሰብ ለኣኸ፤ ዮሴፍ ንባርነት ተሸጠ። 18 ኣእጋሩ ብመቝሕ ደኸማ፤ ነፍሱውን ካብ መቝሕ ኣምለጠት። 19 ቃሉ ኽሳዕ ዝመፀሉ፥ ቃል እግዚኣብሄር ፈተኖ። 20 ንጉስ፥ ልኢኹ ፈትሖ፤ እቲ ሓለቓ ኣህዛብውን ኣፍትሖ። 21 ጐይታ ቤቱ ገበሮ፤ ኣብ ልዕሊ ዅሉ ጥሪቱውን ኣዛዚ ገበሮ። 22 ነሕሉቕ ከም ድላዩ ኽግስፅ፥ ነቶም መማኽርቱውን ጥበበኛታት ምእንቲ ኽገብሮም እዩ። 23 እስራኤል ናብ ግብፂ ኣተወ፤ ያእቆብውን ኣብ ምድሪ ካም ተቐመጠ። 24 ንህዝቡ የመና ኣብዝሖም፤ ካብ ፀላእቶምውን ኣበርትዖም። 25 ንህዝቡ ኽፀልእዎም፥ ንባሮቱ ኽተናዀልዎም ልቦም ለወጠ። 26 ንባርያኡ ንሙሴን ነቲ ዝሓረዮ ኣሮንን ለኣኸ። 27 ናይ ተኣምራቱ ምልክት ኣብ ልዕሊኣቶም፥ ዘደንቕ ነገርውን ኣብ ምድሪ ካም ገበረ። 28 ፀልማት ሰደደ፤ ፀልመቶምውን፤ ንቓሉውን ዓመፁ። 29 ንማያቶም ናብ ደም ለወጠ፤ ንዓሳታቶም ከዓ ቐተለ። 30 ምድሮምን፥ ኣብያተ ነገስታቶምን ብጭንቍራዕ መልኡ። 31 ተናገረ፤ ዕስለ ፅንፅያን ቃርማን ናብ ወሰና ወሰኖም መፁ። 32 ንዝናሞም በረድ ገበሮ፤ ሓዊ ኣብ ምድሮም ተባርዐት። 33 ንወይኖምን ንበለሶምን ኣጥፍአ፤ ንዅሉ ኣእዋም ዓዶምውን ሰባበረ። 34 ተናገረ እሞ፥ ስፍሪ ቝፅሪ ዘይብሉ ኣንበጣን ኵብኵብታን መፀ፤ 35 ንዅሉ ተኽልታት ሃገሮም በልዖ፤ ንዅሉ ፍረ ምድሮምውን በልዐ። 36 ንዅሉ በዅሪ ሃገሮም፥ ንዅሉ በዅሪ ሓይሎም ቀተለ። 37 ምስ ወርቅን ብሩርን ኣውፅኦም፤ ኣብ ማእኸል ነገዳቶም ደዌ ኣይነበረን። 38 ፈሪሖምዎም ነይሮም እዮምሞ፥ ብምውፃኦም ግብፂ ተሓጐሰት። 39 ደመና ንመጋረዲ ዘርግሐሎም፤ ሓዊ ድማ ብለይቲ ኸብርሀሎም ዘርግሐ። 40 ለመኑ ብርንሂጎታት ድማ ኣምፅአሎም፤ ብሕብስቲ ሰማይውን ኣፅገቦም። 41 ኰዅሒ ሰንጠቐ፤ ማያትውን ኣውሓዘ፤ ወሓይዝ ብበረኻ ኸዱ። 42 ነቲ ቕዱስ ቃሉን፥ ነቲ ባርያኡ ኣብርሃምን፥ ዘኪሩ እዩ እሞ። 43 ንህዝቡ ብሓጐስ፥ ነቶም ዝተመረፁ ኸዓ ብዕልልታ ኣውፅኦም። 44 ሃገራት ኣህዛብውን ሃቦም፤ ንናይ ባዕዲ ድኻምውን ወረሱ። 45 ትእዛዛቱ ምእንቲ ኽሕልዉን፥ ሕጉውን ምእንቲ ኽፍፅሙን እዩ። ሃሌ ሉያ።

¹ ሃሌ ሉያ። እግዚኣብሄር ሕያዋይ እዩ፤ ምሕረቱውን ንዘለኣለም እዩ እሞ፥ ኣመስግንዎ። ² ንሓይሊ እግዚኣብሄር መን ክናገር ይኽእል? ንዅሉ ምስጋናኡኸ መን የስምዕ? ³ ኵልሻዕ ፍትሒ ዝሕልዉን ቅንዕና ዝገብሩን ዝተባረኹ እዮም። ⁴ ኦ ጐይታ፥ ንህዝብኻ ብሞገስ ዘክረና። ⁵ ብመድሓኒትካ ድማ ተመልከተና፤ ሰናይ ናይ እቶም ዝመረፅካዮም ምእንቲ ኽንርኢ፥ ብደስታ ህዝብኻውን ምእንቲ ኽንሕጐስ፥ ምስ ርስትኻውን ምእንቲ ኽንሕበን። ⁶ ምስ ኣቦታትና ሓጢኣት ገበርና፤ ዓመፅና፥ ክፉእውን ገበርና። ⁷ ኣቦታትና ኣብ ግብፂ እንተለዉ፥ ነቲ ዝገበርካዮ ዘደንቅ ተኣምራት ኣየስተውዓልዎን፤ ነቲ ብዙሕ ምሕረትካውን ኣይሓሰብዎን፤ ብባሕሪ ኤርትራ ምስ ሓለፉ ዓመፁ። ⁸ ሓይሉ ምእንቲ ኸፍልጥ፥ ስለ ስሙ ኢሉ ኣድሓኖም። ⁹ ንባሕሪ ኤርትራ ገሰፃ እሞ ነፀፈት፤ ከም ምድረ በዳ ብዓሚቝ መርሖም። ¹⁰ ካብ ኢድ ተፃረርቶም ድማ ኣድሓኖም፤ ካብ ኢድ ፀላእቶምውን ኣናገፎም። ¹¹ ነቶም ዘሳጐጉዎም ግና ማይ ደፈኖም፤ ካብኣቶም ሓደ እኳ ኣይተረፈን። ¹² ሽዑ ብቓሉ ኣመኑ፤ ምስጋናኡውን ዘመሩሉ። ¹³ ቀልጢፎም ንስራሑ ረስዕዎ፤ ብምኽሩውን ኣይተዓገሱን። ¹⁴ ኣብ ምድረ በዳ ብዙሕ ተመነዩ፤ ኣብ በረኻውን ንእግዚኣብሄር ተፈታተንዎ። ¹⁵ ንሱውን ዝለመንዎ ሃቦም፤ ግና ንነፍሶም ዕብራን ሰደደሎም። ¹⁶ ኣብቲ ሰፈር፥ ንሙሴን፥ ነቲ እግዚኣብሄር ዝቐደሶ ኣሮንን ኣቘጥዕዎም። ¹⁷ ምድሪ ተኸፊታ ንዳታን ወሓጠቶ፤ ንወገን ኣቤሮንውን ደፈነቶም። ¹⁸ ኣብ ማሕበሮምውን ሓዊ ነደደ፤ ነበልባል ንሓጥኣን ኣቃፀሎም። ¹⁹ ኣብ ኮሬብውን ምራኽ ሰርሑ፤ ነቲ ዝፈሰሰ ምስሊ ድማ ሰገዱ። ²⁰ ንኽብሮምውን፥ ብምስሊ ሳዕሪ ዝበልዕ ብዕራይ ለወጥዎ። ²¹ ነቲ ኣብ ግብፂ ዓብዪ ተኣምራት ዝገበረ፥ ንዘድሓኖም እግዚኣብሄር ረስዕዎ። ²² ንሱ ኣብ ምድሪ ኸም ዓበይቲ ተኣምራት፥ ኣብ ባሕሪ ኤርትራ ኸዓ ዘደንቕ ነገራት ዝገበረ እዩ። ²³ ስለዙይ ሽዑ “ከጥፍኦም እየ” በለ፤ ግና እቲ እግዚኣብሄር ዝሓረዮ ሙሴ፥ እግዚኣብሄር ተቘጢዑ ኸየጥፍኦም፥ ካብ ቍጥዓኡ ምእንቲ ኽምለስ፥ ኣብ ቅድሚኡ ኣብ ማእኸል ቆመ። ²⁴ ነታ ፍትውቲ ምድሪ ነዓቕዋ፤ ብቓሉውን ኣይኣመኑን። ²⁵ ኣብ ውሽጢ ድንኳኖም ኮይኖም ኣጕረምረሙ፤ ቃል እግዚኣብሄርውን ኣይሰምዑን። 26-27 ኣብ ምድረ በዳ ኽድርብዮም፥ ንዘርኦምውን ኣብ ማእኸል ኣህዛብ ክድርቢ፥ ናብ ዝተፈላለየ ሃገር ፋሕ ከብሎም፥ ኣብ ልዕሊኣቶም ኢዱ ኣልዓለ። 28 ምስ ብዔል ፌጎርውን ተሓባበሩ፤ መስዋእቲ ምዉታትውን በልዑ። 29 ብግብርታቶም ኣቘጥዕዎ፤ መዓትውን ኣብ ልዕሊኣቶም ወረደ። 30 ሽዑ ፊንሃስ ተሲኡ ፈረዶም፤ እቲ መዓት ድማ ሓደገ። 31 እዙይ ንሓዋሩ ንውሉድ ወለዶ፥ ፅድቂ ኾይኑ ተቘፀረሉ። 32 መሊሶም ኣብ ማይ መሪባ ኣቘጥዕዎ፤ ሙሴውን ካብኣቶም ዝተልዓለ ተቘጥዐ። 33 ንመንፈሱ ስለ ዘምረርዋ ድማ፥ ብኸናፍሩ ስንፍና ተዛረበ። 34 ከምቲ እግዚኣብሄር ዝኣዘዞም፥ ንኣህዛብ ኣየጥፍእዎምን፤ 35 እኳ ደኣ ምስ ኣህዛብ ተሓዋወሱ፤ ተግባራቶምውን ተምሃሩ። 36 ንጣዖታቶምውን ተገዝኡ፤ እዙይ ከዓ መፃወድያ ኾኖም። 37 ነወዳቶምን ነጓላቶምን ከዓ፥ ነጋንንቲ ሰውእዎም። 38 ናይ ኣወዳቶምን ኣጓላቶምን፥ ንፁህ ደም ኣፍሰሱ፤ ንጣዖታት ከነዓን ሰውእዎም፤ እታ ምድሪ እውን ብደም ረኸሰት። 39 ብተግባራቶም ረኸሱ፤ ብግብሮምውን ኣመንዘሩ። 40 ስለዙይ ቍጥዓ እግዚኣብሄር፥ ኣብ ልዕሊ ህዝቡ ነደደ፤ ነቶም ርስቱ ኸዓ ተፀየፎም። 41 ኣብ ኢድ ኣህዛብ ኣሕሊፉ ሃቦም፤ እቶም ፀላእቶም ድማ ገዝእዎም። 42 ፀላእቶምውን ኣሳቐይዎም፤ ኣብ ትሕቲ ኢዶም ከዓ ተዋረዱ። 43 እግዚኣብሄር ንህዝቡ ብዙሕ ጊዜ ኣድሓኖም፤ ንሳቶም ግና ብምኽሮም ኣቘጥዕዎ፤ ብሓጢኣቶም ከዓ ተዋረዱ። 44 ንሳቶም ናብኡ ምስ ኣእወዩ ግና ሰምዖም፤ መከራኦም ድማ ተመልከተ። 45 ምእንትኣቶም ኢሉ ቓል ኪዳኑ ዘከረ፤ ከም ብዝሒ ምሕረቱውን ራህርሀሎም። 46 ኣብ ቅድሚ እቶም ዝማረኽዎምውን፥ ሞገስ ሃቦም። 47 ንቕዱስ ስምካ ምእንቲ ኽነመስግን፥ ብምስጋናኻውን ኽንምካሕስ፥ ኦ ጐይታ ኣምላኽና ኣድሕነና፤ ካብ ማእኸል ኣህዛብውን ኣክበና። 48 እግዚኣብሄር ኣምላኽ እስራኤል፥ ካብ ዘለኣለም ክሳዕ ዘለኣለም ይባረኽ፤ ኵሉ ህዝቢ እውን “ኣሜን” ይበል። ሃሌ ሉያ።

ዳዊት 104 · ዳዊት 105 · ዳዊት 106 · ትመ15