እቶም ህዝቢ ኣብ የሩሳሌም ቤተ መቕደስ ይሃንጹ ነበሩ። ቅድሚ ነዊሕ እዋን ካብ ምርኮ ተመሊሶም ነበሩ፣ ግናኸ መሰረት ቤተ መቕደስ ምስ ኣንበሩ ብተቓውሞ ተስፋ ቖረጹ። ንሓያሎ ዕስራ ዓመታት ዕዮኦም ደው በለ ክሳዕ እግዚኣብሔር ንሓጋይን ዘካርያስን ንኸበራብሮም ዝጥቀመሎም።
ኣብዚ እዋን እዚ ኣብ ዘካርያስ 7፡ እቶም ህዝቢ ብመንፈስ ተበራቢሮም ነበሩ እሞ ብዛዕባ እታ ኣብ ሓምሻይ ወርሒ ዝነበረት መዓልቲ ሓዘን እዚ ጽቡቕ ሕቶ እዚ ሓተቱ። እዚ ስርዓት እዚ ቤተ መቕደስ ብሰራዊት ባቢሎን ኣብታ ወርሒ እቲኣ ምስ ጠፍአ (ኤር. 52:12) ናብ ኣቈጻጽርኦም ወሲኾምዎ ነበሩ። እቲ ሕቶ ባዕሉ ንጹር ነበረ እሞ “እወ/ኣይፋል” ዝብል መልሲ ይጽበ ነበረ። ግናኸ እግዚኣብሔር ፍጹም ብዝተፈላለየ መገዲ መለሰ! ብዘካርያስ ኣቢሉ ድማ፡ “ኣብተን ሰብዓ ዓመታት ኣብ ሓምሻይን ሻውዓይን ወርሒ ኽትጸውሙን ክትሓዝኑን ከለኹም፡ ንዓይዶ ኢኹም ጸዊምኩም—ንዓይዶ፧ ክትበልዑን ክትሰትዩን ከለኹምከ፡ ንርእስኹምዶ ኣይትበልዑን ኣይትሰትዩን ኢኹም፧” (ዘካ. 7:5–6) በለ።
እግዚኣብሔር “እወ” ወይ “ኣይፋል” ኣብ ክንዲ ዝምልስ፡ “ስለምንታይ፧” ኢሉ መለሰ። ንሱ ንግብሮም ዘይኮነስ ንምኽንያቶም መርመሮ። ይጸውሙ ነበሩ፣ ግናኸ ምስ ክብሪ ኣምላኽ ብዙሕ ዘይተኣሳሰር ልምዲ ጥራይ ነበረ። ክንደይ ሳዕ ኢና ንሕና እውን ንልምድታትና ኣብ ክንዲ ተግባራት ኣምልኾ ወይ ኣገልግሎት፡ ልምድታት ጥራይ ክኾኑ እንፈቕደሎም!
እግዚኣብሔር ነቲ ጾም ባዕሉ ኣይኮነነን ወይ ኣየመስገነን። ኣብ ክንዳኡስ፡ ንጾሞም ጥራይ ዘይኮነስ፡ ንንቡር መዓልታዊ ምብላዖምን ምስታዮምን እውን ከስተንትኑ ሓተቶም። ምጽዋም ጽቡቕ ምዃኑ፡ ግናኸ መዓልትታት ጾሞምን መዓልትታት ምብላዖምን ንእኡ ብምፍራህ እንተ ተነቢሩ ጥራይ ምዃኑ ገለጸ! ንሕና እውን ኣብዚ ዘመንና እዚ ነዚ ተመሳሳሊ ምዕዶ ንሰምዕ ኢና፡ “ስለዚ፡ እንተ በላዕኩም ወይ እንተ ሰተኹም፡ ወይ ዝኾነ ይኹን እንተ ገበርኩም፡ ኩሉ ንኽብሪ ኣምላኽ ግበሩ” (1 ቈረ. 10:31)።
