የሆያኪም ብፈርኦን እተሰርዐ እዩ ነይሩ። ግናኸ ካብ ራብዓይ ዓመት ንግስናኡ ጀሚሩ፡ ነቡካድነጻር ደየበ እሞ የሆያኪም ባርያኡ ኮነ። እዚ ድማ ዳንኤልን ካልኦትን ናብ ባቢሎን እተወስዱሉ ናይ ፈለማ ምግዓዝ እዩ። እዋን ኣህዛብ ካብ ቀዳማይ ዓመት ንግስና ነቡካድነጻር ጀሚሩ ነይሩ። ድሕሪ ሰለስተ ዓመት ግና ንጉስ የሆያኪም ንንጉስ ባቢሎን ዓለዎ። ኣምላኽ ነዚ ዕልወት እዚ ብሕታዊ መልሲ ሃበ፡ ከመይሲ ንነቡካድነጻር ንጉስ ገይሩ ኣብ ልዕሊኦም ሰሪዕዎ ነይሩ። እዚ ስልጣን እዚ ኻብኡ እዩ ነይሩ እሞ፡ ክግዝእዎ ነበሮም። እዚ ዕልወት እዚ ድማ ንስልጣን ኣምላኽ ዝጻረር ነይሩ።
ስለዚ፡ ንጉስ ባቢሎን ነቲ ጕዳይ ንምፍታሕ ከም ዝበሃል ቅድሚ ምምጻኡ፡ እግዚኣብሄር ባዕሉ ንይሁዳ ሰራዊት ከለዳውያንን ሶርያውያንን ሞኣብን ደቂ ኣሞንን ለኣኸ። እዚ ፍርዲ እዚ ድማ ምስቲ ኣስታት ዓሰርተ ዓመት ቅድሚኡ ዝነበረ እኩይ ተግባራት ምናሴ ተኣሳሲሩ ነይሩ፡ ማለት ሓጢኣታቱን እቲ ንየሩሳሌም ዝመልኣሉ ንጹህ ደምን።
ኣብ ዓሰርተ ሓደ ዓመት የሆያኪም፡ ነቡካድነጻር ነታ ከተማ ወሰዳ እሞ ነቲ ንጉስ ቀተሎ። ፍርዲ ኣብ ልዕሊ እቲ ንኣምላኽን ስልጣኑን ዝነጸገ ንጉስ መጸ።
እዚ ናይ ንግስና የሆያኪም ፍጻሜ እዚ ንሮሜ 13:1–2 የዘኻኽረና፡ “ነፍሲ ወከፍ ነፍሲ ንላዕለዎት ስልጣናት ትገዝእ። ከመይሲ ኻብ ኣምላኽ ዘይኮነ ስልጣን የልቦን፡ እቶም ዘለዉ ስልጣናት ድማ ብኣምላኽ እተሰርዑ እዮም። ስለዚ እቲ ንስልጣን ዝጻረር ንትእዛዝ ኣምላኽ ይጻረር፡ እቶም ዝጻረሩ ድማ ፍርዲ ኣብ ርእሶም የምጽኡ።” ደቂ ኣምላኽ ብፍላይ ንስልጣናት ክግዝኡ ተጸዊዖም እዮም፡ ከመይሲ ብኣምላኽ እተሰርዑ እዮም። እቲ እንኮ ፍሉይ ኩነታት፡ እቲ ንኣምላኽ ዘይምእዛዝ ዝገብረና እንተኾይኑ እዩ፡ ከምቲ ብዛዕባ የሱስ ከይዛረቡ ወይ ብስሙ ከይምህሩ እተሓተቱሉ (ግብሪ ሃዋርያት 4:18–19)።
